அத்யயனோற்சவம் - 7

                                          பகல் பத்து - ஆறாம் நாள்

இத்தொடரின் மற்ற பதிவுகளையும் காணுங்கள்

1    2    3     4    5    6     8    9    10    11    12    13    14    15    16    17    18    19   20   21   22     

             

                      

                                  

திருமொழித்திருநாள் என்றழைக்கப்படும் பகல்பத்தின் ஆறாம் நாள் அரங்கநகரப்பன் பாண்டியன் கொண்டை, புஜ கீர்த்தி, வைர அபய ஹஸ்தம், இரத்தினக்கிளி, மார்பில் லக்ஷ்மி பதக்கம், காசு மாலை, அர்த்தசந்திரன் அணிந்து எழிலாக சேவை சாதிக்கும் அற்புத தரிசனம்.

                             

ஸ்ரீநிவாசர்  வேணு கோபாலன் திருக்கோலம்

ஆழ்வார்களின் திருமொழிகள் சேவிக்கப்படுவதால் "திருமொழித் திருநாள்" என்றும் அழைக்கப்படும் பகல் பத்து உற்சவத்தின் ஆறாம் நாள் முதல் பத்தாம் நாள் வரை திருமங்கையாழ்வாரின் 'பெரிய திருமொழி' சேவிக்கப்படுகின்றது. ஆழ்வார்களில் கடை குட்டி திருமங்கையாழ்வார். அதிகமான திவ்ய தேசங்களை மங்களா சாசனம் செய்தவரும் இவரே. இவருக்கு உள்ள தனி சிறப்பு பெருமாளே இவருக்கு அஷ்டாக்ஷ்ர மந்திரம் உபதேசம் செய்தது. ஆழ்வாருடைய அடியார்க்கடிமையைக் கண்ட இறைவன் இவருக்கு அருள் புரிய எண்ணி திருமணக் கோலத்தில் சிறந்த அணிகலன்களுடன் தானும் பெரிய பிராட்டியுமாக இவர் பதுங்கி இருக்கும் வழியில் வந்தார். திருமணங்கொல்லையில் திருவரசனடியில் பதுங்கியிருந்த பரகாலர் அவர்களை தன் துணைவர்களுடன் வழிப்பறி செய்தார். அப்போது மணமகன் காலிலிருந்த மோதிரம் கழற்ற முடியாமல் போகவே பல்லால் கடித்து வாங்க பெருமாள் இவரை நம் கலியன் என்று அழைத்தார். பறித்த பொருள்களை மூட்டையாகக் கட்டி தூக்க முயன்ற போது மூட்டை இடம் பெயராததால் பரகாலர் மணமகனை "என்ன மந்திரம் செய்தாய்?" என்று வாள் வீசி மிரட்டினார். 

                                       

மணமகனான எம்பெருமான் மந்திரத்தை கூறுவதாக அருகே அழைத்து பெரிய திரும்ந்திரம் எனப்படும் அஷ்டாக்ஷர மந்திரத்தை உபதேசித்து பெரிய திருவடி மேல் பிராட்டியுடன் சேவை சாதித்தார். மெய்ப்பொருள் உணர்ந்த பரகாலர் "வாடினேன் வாடி வருந்தினேன் ..... கண்டு கொண்டேன் நாராயணா என்னும் நாமம்" என்று பாடத் தொடங்கினார்.

6ம் நாள் முதல் இரண்டு பத்துக்கள் சேவிக்கப்படுகின்றன வட நாட்டுத்திருப்பதிகள் திருப்பிருதி, திருவதரி, திருவதரி ஆசிரமம், திருசாளக்கிரமம், நைமிசாரணியம், சிங்கவேள்குன்றம், திருவேங்கடம் மற்றும் தொண்டை நாட்டுத்திருப்பதிகள் திருவெள்ளூர், திருவல்லிக்கேணி, திருநீர்மலை, திருகடல்மல்லை, திருவிடவெந்தை, திருவட்டபுயகரம், திருபரமேச்சுர விண்ணகரம், நடு நாட்டுத் திருப்பதி திருக்கோவலூர் ஆகிய திவ்ய தேசங்களின் பாசுரங்கள் சேவிக்கப்படுகின்றன. 

அத்யயனோற்சவம் - 6

     பகல் பத்து - ஐந்தாம் நாள்

இத்தொடரின் மற்ற பதிவுகளையும் காணுங்கள்

1    2    3     4    5    7     8    9    10    11    12    13    14    15    16    17    18    19   20   21   22     

             

அழகிய மணவாளர்

(பெரிய பிராட்டியார், ஸ்ரீதேவி, பூதேவி, ஆண்டாள், சேர குல வல்லி, துலுக்க நாச்சியார், உறையூர் வல்லி என்று ஏழு நாச்சிமார்கள் நம்பெருமாளுக்கு எனவே இத்திருநாமம்)

திருமொழித் திருமொழித் திருநாளின் ஐந்தாம் நாள் அன்று அழகிய மணவாளர் கவரிமான் தொப்பாரை கொண்டை, விமான பதக்கம், இரத்தின அபய ஹஸ்தம், இரத்தின கலிங்க தோளா, முத்துச் சரம், பவளமாலை, காசு மாலைகளுடன்  எழிலாக சேவை தந்தருளுகிறார்.

 

விமான பதக்கம்

அரங்கநாதர்,  பெரிய பிராட்டியார், பரவாசுதேவன், உபயநாச்சியார்களுடன் நம்பெருமாள் மற்றும் துவாரபாலகர்கள் இந்த பிராணவாகர விமான பதக்கத்தில் சேவிக்கலாம்.

காவேரி விரஜா ஸேயம் வைகுண்டம் ரங்கமந்திரம் |

ஸவாஸு  தேவோ ரங்கேஸ:   ப்ரத்யக்ஷம்  பரமம் பதம் |

விமானம் ப்தணவாகாரம் வேதஸ்ருங்கம் மஹாத்புதம் |

ஸ்ரீரங்கஸாயி பகவான் ப்ரணவார்த்த ப்ரகாஸ : 

காவேரியே வைகுந்தத்தின் விரஜா நதி, திருவரங்கமே வைகுண்டம். சர்வேஸ்வரனான ஸ்ரீவாசுதேவனே ஸ்ரீரங்கநாதன். காணக்கூடிய பரமபதம் இதுவே. ஸ்ரீரங்கவிமானமே பிரணவத்தின் உருவம்.அதன் அற்புதமான கலசங்களே வேதங்கள்.  திருவரங்கத்தில் பள்ளி கொண்ட பெருமாளே கடவுளாகவும், பிரணவத்தின் பொருளாகவும் விளங்குகிறார்.

    

  

ஸ்ரீநிவாசர்  இராஜகோபாலன் திருக்கோலம்

பகல் பத்து உற்சவத்தின் ஐந்தாம் நாள் முதல் ஆயிரத்தில் உள்ள மற்ற ஆழ்வார்களின் பாசுரங்கள் சேவிக்கப்படுகின்றன.

திருமழிசையாழ்வாரின் திருச்சந்த விருத்தம்

தொண்டரடிப்பொடியாழ்வாரின் திருமாலை, திருபள்ளியெழுச்சி.

திருப்பாணாழ்வாரின் அமலனாதிபிரான்

மதுர கவியாழ்வாரின் கண்ணி நுண் சிறுத்தாம்பு ஆகிய பாசுரங்கள் இன்று சேவிக்கப்படுகின்றன.

திருமழிசையாழ்வார் பெருமாளையே சொன்ன வண்ணம் செய்ய வைத்தவர், திருக்குடந்தை ஆராவமுதரை எழுந்து பேச வைத்தவர். முதலில் சிவ வாக்கியர் என்று சைவராக இருந்தவர் ஸ்ரீமந் நாராயணனே முழு முதற் கடவுள் என்பதை உணர்ந்து வைணவராகியவர். பக்தி ஸாரர் என்றும் அழைக்கப்படுகின்றார். திருசந்த விருத்தம். நான் முகன் திருவந்தாதி என்ற நூல்களை அருளினார்.

தொண்டரடிப்பொடியாழ்வார் ஒருவர்தான் அரங்கனைத் தவிர வேறு ஒரு பெருமாளையும் மங்களா சாசனம் செய்யாதவர். விதி வசத்தால் தேவ தேவி என்ற பெண்ணினால் திசை மாறி சென்ற ஆழ்வாரை தடுத்து அந்த திருவரங்கத்து இன்னமுதன் ஆட்கொள்ள அவரையே பற்றுக்கோடாக கொண்டு வாழ்ந்தவர்.

பச்சைமா மலைபோல் மேனி பவளவாய் கமலச் செங்கண்

அச்சுதா! அமரரேறே! ஆயர் தம் கொழுந்தே என்னும்

இச்சுவை தவிர யான் போய் இந்திர லோகமாளும்

அச்சுவை பெரினும் வேண்டேன் அரங்கமா நகருளானே ! என்று பாடியவர். மேலும் அரங்கனுக்கு திருப்பள்ளியெழுச்சி பாடியவரும் இவரே.

திருப்பாணாழ்வார் அரங்கன் மீது மிகவும் பக்தி கொண்டிருந்தவர் யாழ் கொண்டு பண்பாடும் குலத்தை சார்ந்தவர். தெரியாமல் அரங்கனுக்கு தீர்த்தம் கொண்டு வரும் வழியில் நின்றிருந்தவரை பட்டர் தாக்க அவர் தலையிலிருந்து இரத்தம் கொட்டியது. கருவறையை அடைந்த போது அரங்கன் தகையிலும் அதே இடத்திலிருந்து இரத்தம் கொட்டுவதை கண்டு வருந்தி ஆழ்வாரின் பெருமையை உணர்ந்து அவரை மரியாதையுடன் அழைத்து வந்து கருவறையில் நிறுத்திய போது அவர் பாடிய பாசுரம் தான் அமலனாதிபிரான்.

அரங்கனது திருவடி தொடங்கி திருமுடியீறாக நன்கு சேவித்து அவ்வெழிலைக் கூறும் அமலனாதிபிரான் என்ற பத்து பாசுரங்களைப் திருவாய் மலர்ந்தருளினார்.

அவரது முதல் பாசுரம் அமலனாதிபிரான் என்று ’அ’காரத்தில் துவங்குகின்றது இரண்டாவது பாசுரம் உந்தி ’உ’காரத்தில் துவங்குகின்றது. மூன்றாவது பாசுரம் மந்தி ’ம’காரத்தில் துவங்குகின்றது . அ+உ+ம = ஓம் ஆகவே திருப்பாணாழ்வாரின் பாசுரம் பிரணவத்தின் விளக்கம்.

கொண்டல் வண்ணனைக் கோவலனாய் வெண்ணெய்

யுண்டவாயன் என்னுள்ளம்கவர்ந்தானை

அண்டர்கோனணியரங்கன் என்னமுதினைக்

கண்ட கண்கள் மற்றொன்றினைக் காணாவே. என்று நிறைவாக அருளி பெரிய பெருமாளின் திருவடியில் இரும்புண்ட நீர் போல கலந்து மறைந்தார்.

பெருமாளைப் பாடாமல் தந்து ஆச்சாரியனான நம்மாழ்வாரை மட்டுமே பாடியவர் மதுரகவியாழ்வார். வேதங்களையும், சாத்திரங்களையும் கற்றுத் தேர்ந்து செவிக்கினிய செஞ்சொற்கவி பாடுமாற்றல் பெற்று மதுரகவி என்று பெயர் பெற்றார். இவர் வட நாட்டில் பயணம் செய்து கொண்டிருந்த போது தென் திசையில் ஒரு பேரொளி தோன்றியதைக் கண்டு அங்கே வந்து நம்மாழ்வாரை சேவித்து அவரது žடரானார். அவரது புகழை பரப்பினார். அவர் எழுதிய பாசுரம் கண்ணிநுண்சிறுத்தாம்பு.

அத்யயனோற்சவம் - 5

                                பகல் பத்து -   நான்காம் நாள்

இத்தொடரின் மற்ற பதிவுகளையும் காணுங்கள்

1    2    3      4    6    7     8    9    10    11    12    13    14    15    16    17    18    19   20   21   22     

           

மஹாலக்ஷ்மி பதக்கம்

திருமொழித்திருநாளின் நான்காம் நாளான இன்று நம்பெருமாள் சௌரி கொண்டை, வைர அபய ஹஸ்தம், மார்பில் மஹா லக்ஷ்மி பதக்கம்,  முத்துச்சரம், பவளமாலை , அவுரி சரம் உள்ளிட்ட திருவாபரணங்கள் அணிந்து அர்ஜுன மண்டபம் எழுந்தருளி அருள் பாலித்தார். 

திருவடி சரணம் 

அரங்கமா நகருளான்

பகல் பத்து உற்சவத்தின் நான்காம் நாள் குலசேகர ஆழ்வாரின் பெருமாள் திருமொழி சேவிக்கப்படுகின்றது. 

ஒவ்வொரு ஆழ்வாருக்கும் ஒரு தனி சிறப்பு உண்டு. குலசேகர ஆழ்வாரின் சிறப்பு அவர் இராமன் மேல் கொண்ட பக்தி . பெருமாள் என்று அழைக்கப்படும் இராமபிரானின் மேல் உணர்ச்சி உந்திய அன்புப் பேராறு பூண்டமையின் ஆழ்வாரை "குல சேகர பெருமாள்" என்று சிறப்பாக வழங்கலாயினர். இவர் இயற்றிய பாசுரங்கள் "பெருமாள் திருமொழி" என்று அழைக்கப்படலாயின. 

பெரியாழ்வார் கண்ணனுக்குத் தாலாட்டுப் பாடியது போல குலசேகராழ்வார்.

மன்னுபுகழ்க் கௌசலைதன் மணிவயிறுவாய்த்தவனே!தென்னிலங்கைக்கோன்முடிகள் சிந்துவித்தாய்! செம்பொன்சேர்கன்னிமாமதிள்புடைசூழ் கணபுரத்தென்கருமணியே!என்னுடையவின்னமுதே! இராகவனே! தாலேலோ -  என்று  இராமனுக்கு தாலாட்டுப் பாடியவர். 

                             

ஸ்ரீநிவாசர் யோகநரசிம்மர் திருக்கோலம்

                            

இந்த கலி காலத்தில் நல்லவர்கள் தான் மிகவும் துன்பப்படுகிறார்கள், எவ்வளவுக்கு எவ்வளவு கொடிய பாவங்களை செய்கின்றார்களோ அவர்கள் எல்லாரும் மிகவும் நன்றாக இருக்கின்றார்கள் என்று பொதுவாக தோன்றுகிறது அது உண்மையள்ள என்பதற்கு குலசேகராழ்வார் ஒரு பாசுரம் பாடியுள்ளார். தமிழ் படித்த அனைவரும் பள்ளியில் சிறு வயதில் இந்த பாசுரத்தை படித்திருப்போம். 

வாளாலறுத்துச்சுடினும் மருத்துவன்பால்

மாளாதகாதல் நோயாளன்போல் மாயத்தால்

மீளாத்துயர்தரினும் விற்றுவக் கோட்டம்மா! நீ

ஆளாவுனதருளே பார்ப்பனடியேனே.

மருத்துவர் நம் நோய் தீர கத்தியால் அறுத்து சுடுவது போல மாயையால் நமக்கு துன்பன் அளிப்பவரும் பெருமாளே. நமது கர்ம விணைகள் தீர்ந்தால் தான் அவரது திருவடியை அடையலாம் ஆகவே துன்பங்கள் எல்லாம் நம்மை அவரிடம் அழைத்துச் செல்லும் படிகள். ஒன்றே ஒன்று வேண்டும் அது தான் பூரண சரணாகதி, மற்ற எல்லாவற்றையும் அவர் பார்த்துக் கொள்வார். 

குலசேகராழ்வார் மஹாவிஷ்ணுவின் கௌஸ்துபத்தின் அம்சமாக அவரரித்தவர்.

வைணவத்திருக்கோவில்களில் கர்ப்பகிரகத்தின் திருப்படி (உள் வாயிற் படி) "குலசேகராழ்வார் திருப்படி " என்று அழைக்கப்படுகின்றது அதற்கு குலசேகரர் பாடிய பாசுரத்தில் என்ன என்ன கூறுகின்றார் பாருங்கள் 

அரசராக இருந்து மண்ணாண்ட அவர் வேண்டாதது:

ஊனேறு செல்வத்து உடற்பிறவியான் வேன்டேன்

வானாளும் செல்வமும் மண்ணரசும் யான் வேண்டேன்

மின்னனையநுண்ணிடையார் உருப்பசியும் மேனகையும்அன்னவர்தம்பாடலொடும் ஆடலவையாதரியேன்

மன்னவர்தம் கோனாகிவீற்றிருந்து கொண்டாடும் செல்வறியேன்

ஆனால் அவர் வேண்டுவது

வேங்கடத்து கோனேரி வாழும் குருகாய்ப் பிறப்பேனே - பறவையாய்

திருவேங்கடச் சுனையில் மீனாய் பிறப்பேனே - மீனாய்

வேங்கடக் கோந்தானுமிழும் பொன் வட்டில் பிடித்து உடனே புகப்பெறுவெனாவேனே - பணியாளனாய்

பண்பகரும்வண்டினங்கள் பண்பாடும் வேங்கடத்துசெண்பகமாய் நிற்கும் தவமுடையெனாவேனே - மலராய்/மரமாய்

எம்பெருமானீசன் எழில் வேங்கடமலைமேல்தம்பகமாய்நிற்கும் திருவிடையெனாவேனே - புதராய்

தென்னென வண்டினங்கள்பண்பாடும் ங்கடத்துள்அன்னனையபொற்குவடாம் அருந்தவத்தெனாவேனே -சிகரமாய்

திருவேங்கட மலையில் கானாறாய்ப்பாயும் கருத்துடையயெனாவேனே - ஆறாய்

திருவேங்கட மலை மேல் நெறியாய்க் கிடக்கும் நிலையுடையெனாவேனே - பாதையாய்

திருவேங்கடமென்னும் பொன்மலை மேல் ஏதேனுமாவேனே - எதுவாக ஆனாலும் சரி

செடியாய்வல்விணைகள் தீர்க்கும்திருமாலே!

நெடியானே! வேங்கடவா! நின் கோவில் வாசல்

அடியாரும் வானவரும் அரம்பையரும் கிடந்தியங்கும்

படியாய்க் கிடந்து உன் பவளவாய் காண்பேனே.

வேங்கடம் என்பது வேம் - பாவம் + கடம் - எரித்தல் அதாவது பாவங்களை அழிக்கும் மலை. என்றும் வேம் - அழியாத + கடம் - ஐஸ்வர்யம் , அதாவது அழியாத ஐஸ்வர்யம் அளிக்கும் மலை என்றும் பொருள் படும். அந்த திருவேங்கடமலையில் அனைவரும் ஏறிச்சென்று எம்பெருமானை வழிபடும் படியாக கிடந்து பெருமாளின் பவள வாயைக் காண வேண்டும் என்று பாடியதால் தான் கர்ப்பகிரகத்து படி குலசேகராழ்வார் படி என்று அழைக்கப்படுகின்றது. 

திருவரங்கத்தில் இன்று

அரையர் அபிநயம் & வியாக்கியானம்-

“கண்ணனென்னும் கருந்தெய்வம்” நாச்சியார் திருமொழி பாசுரம்

“இருளிரிய சுடர்மணி” பெருமாள் திருமொழி பாசுரம்

இன்றைய சிறப்பு – 2 அரையர் சேவைகள்

இரண்டாம் அரையர் சேவையில் இன்றைய நிகழ்வு: கம்சவதம்

அத்யயனோற்சவம் - 4

பகல் பத்து -   மூன்றாம் நாள்

இத்தொடரின் மற்ற பதிவுகளையும் காணுங்கள்

1    2    3      5    6    7     8    9    10    11    12    13    14    15    16    17    18    19   20   21   22     

           

                          

பகல் பத்து உற்சவத்தின் மூன்றாம் நாளான இன்று திருவரங்கத்தில் நம்பெருமாள் முத்து கிரீடம், இரத்தின அபய ஹஸ்தம், நெற்றியில் கலிங்க தோளா, முத்துச் சரம், அண்ட பேரண்ட பட்சி பதக்கம், இரத்தின பாதங்களுடன் எழிலாக சேவை சாதிக்கின்றார்.

                                 

ஸ்ரீநிவாசர் ஏணிக் கண்ணன் கோலம் 

பகல் பத்தின் மூன்றாம் நாள் "சூடிக் கொடுத்த சுடர்க் கொடியாள்" , ஆண்டாள் நாச்சியாரின் திருப்பாவையும், நாச்சியார் திருமொழியும் சேவிக்கப்படுகின்றது.

         

பூமாதேவியாரே ஆண்டாளாக அவதரித்து சரணாகதி தத்துவத்தை நமக்கு போதித்தார்.

தனனை கோபிகையாக பாவித்து கண்ணனை கணவனாக அடையவும், நல்ல மழை பொழிந்து எங்கும் வளம் பெருகவும், ஸ்ரீ வில்லிபுத்தூரையே கோகுலமாகவும், வட பத்ர சாயியையே கண்ணனாகவும் கொண்டு பாவை நோன்பிற்காக ஆண்டாள் பாடிய முப்பது பாசுரங்களே திருப்பாவை. சரணாகதி தத்துவத்தை அருமையாக காட்டுகின்றாள் பிராட்டி இந்த பாசுரத்தில்

சிற்றஞ் சிறுகாலே வந்துன்னை சேவித்துஉன்

பொற்றா மரையடியே போற்றும் பொருள் கேளாய்

பெற்றம்மேய்த் துண்ணும் குலத்தில் பிறந்து நீ

குற்றேவல் எங்களைக் கொள்ளாமல் போகாது

இற்றைப் பறைகொள்வான் அன்றுகாண் கோவிந்தா!

எற்றைக்கும் ஏழேழ் பிறவிக்கும் உன்தன்னோடு

உற்றோமே ஆவோம் உனக்கே நாம் ஆட்செய்வோம்

மற்றைநம் காமங்கள் மாற்றேலோ ரெம்பாவாய்.

இப்பிறவியில் மட்டுமல்ல ஏழேழு ஜன்மங்களிலும் உனக்கு சேவை செய்து கொண்டு உன் காலடியில் கிடக்க வேண்டும் மற்ற எண்ணங்கள் வந்தாலும் அதை நீ மாற்று என்று பாடுகிறார் ஆண்டாள்.

திருப்பாவை, "ஆன்ம நேயத்தை" போதிக்கின்றது. ஒரு ஆன்மா பிற ஆன்மாக்கள் மீது நேயம் கொண்டு தன்னோடு அவை அனைத்தும் இறைவனை அடையுமாறு செய்யும் நோக்கில் பாடப்பட்ட பாடல்களே இவை. "வஸுதைவ குடும்பகம்" என்று வட மொழியில் உலகம் எல்லாம் ஒரே குடும்பம் என்றும் நமது தமிழில் "யான் பெற்ற இன்பம் பெருக இவ்வையகம் " என்பதும் இந்நெறிதானன்றோ?

நாச்சியார் திருமொழியில் கண்ணனைத்தவிர வேறு யாருக்கும் தான் வாழ்க்கைப் பட மாட்டேன் என்பதில் உறுதியாக இருப்பதை தெளிவாக பாடுகின்றார் ஆண்டாள், மன்மதனை, குயிலை, பூக்களை, மேகங்களை தூதாக அன்ய்ப்புகின்றாள், கூடலிழைத்து பார்க்கின்றாள், கண்ணனுடன் திருமணம் நடைபெறுவதாக கனவு காண்கிறாள். இறுதியில் விருந்தாவனத்தில் பரந்தாமனைக் கண்டதைப் பாடுகின்றாள். இந்த மூன்றாம் நாள் நாமும் அந்த எம்பெருமானிடம் சரணாகதி அடைந்து உய்வோமாக. 

அத்யயனோற்சவம் - 3

                                    பகல் பத்து - இரண்டாம் நாள்

 இத்தொடரின் மற்ற பதிவுகளையும் காணுங்கள்

1    2    4     5    6    7     8    9    10    11    12    13    14    15    16    17    18    19   20   21   22     

                                         

ஸ்ரீநம்பெருமாள் பகல்பத்தின் இரண்டாம் நாள்  முத்து சாய் கொண்டை, வைர அபய ஹஸ்தம், தங்கக்கிளி, பவள மாலை,  பஞ்சாயுத பதக்கம் அலங்காரத்தில் சேவை சாதிக்கும் அற்புத காட்சி 

ஸ்ரீநிவாசப்பெருமாள் இராமர் கோலம்

                                           

                                                                                 

பகல் பத்தின் இரண்டாம் நாள் பெரியாழ்வாரின் மற்ற பத்துக்கள் (3,4,5) சேவிக்கப்படுகின்றன. பெரியாழ்வாரின் அருளிச் செயல்கள் ’திருப்பல்லாண்டும்’, பாகவதஸாரமாகிய ’பெரியாழ்வார் திருமொழி’யும் ஆகும். கிருஷ்ணாவதாரத்தில் மிகவும் ஈடுபாடு கொண்ட பெரியாழ்வார் பாசுரங்கள் பிள்ளைத் தமிழுக்கு ஒரு முன்னோடி.

திருவரங்கத்தில் பகல்பத்தின் மூன்றாம் நாள்  அரையர் அபிநயம் மற்றும் வியாக்கியான பாசுரங்கள்:

ஆற்றிலிருந்து  விளையாடுவோங்களை 

      சேற்றாலெறிந்து வளைதுகில் கைக்கொண்டு .....

தன்னோராயிரம் பிள்ளைகளோடு 

       தளர்நடையிட்டு வருவான் ......     ஆகிய பாசுரங்கள் ஆகும்.

இன்றைக்கு சேவிக்கப்படும் பெரியாழ்வாரின் 240  பாசுரங்களில் கண்ணனுக்கு முலை கொடுக்க அஞ்சுதல், கன்றின் பின் போக்கியதைக் குறித்து வருந்துதல், கண்ணன் காலிகள் பின் வருவதைக் க்ண்டு மகிழ்தல், கோவர்த்தன மலையை குடையாக எடுத்து ஆயர்கள், ஆநிரை காத்ததை சிறப்பித்தல், கண்ணின் வேய்ங்குழல் ஒசை சிறப்பை பாடுதல், கிருஷ்ணாவதார இராமாவதார சிறப்புகள், சிறிய திருவடி மாருதி அசோக வனத்தில் சீதாப் பிராட்டியாரிடம் கணையாழி அளித்தல் முதலியவற்றைப் பாடி, திருமாலிருஞ்சோலை, திருக்கோட்டியூர், தேவப்ரயாகை, திருவரங்கம்,திருவேங்கடம் ஆகிய திவ்ய தேசங்களின் சிறப்பையும் பாடுகின்றார்.

வடதிசை மதுரை சாளக்கிராமம் 
வைகுந்தம் துவரையயோத்தி
இடமுதைவதரியிடவகையுடைய
எம்புருடோத்தமனிருக்கை என்று வட நாட்டு திவ்ய தேசங்களையும் மங்களாசாசனம் செய்திருக்கின்றார் பெரியாழ்வார். 

மானிட சாதியில் தோன்றிற்று ஓர்மானிட சாதியை
மானிடசாதியின் பேரிட்டால் மறுமைக்கில்லை
வானுடை மாதவா! கோவிந்தா! என்றழைத்தக்கால்
நலமுடைநாரணன் தம்மன்னை நரகம்புகாள். என்று மானிடர்களுக்கு அறிவுரை வழங்கிய பெரியாழ்வாரின் திருமொழிகளை இந்த பகல் பத்தின் இரண்டாம் நாள் சேவித்து நன்மையடைவோமாக. 

     

அத்யயனோற்சவம் - 2

 பகல் பத்து - முதல் நாள்

இத்தொடரின் மற்ற பதிவுகளையும் காணுங்கள்

1    3    4     5    6    7     8    9    10    11    12    13    14    15    16    17    18    19   20   21   22     

நம்பெருமாள் 

ஸ்ரீநம்பெருமாள் நீள்முடி கிரீடம், வைர அபய ஹஸ்தம், திருமார்பில் லட்சுமி பதக்கம், கர்ண பூஷணம்,  பவள மாலை,  அடுக்கு பதக்கம்,  சூரிய பதக்கம் அலங்காரத்தில் சேவை சாதிக்கும் அழகு.

ஆசன பத்மத்திலே அழுந்திய திருவடி நிலைகள்

திருக்கையிலே பிடித்த திவ்யாயுதங்களுடனும் அஞ்சல் என்ற கையும் , கவித்த முடியும், பிரசன்ன முகமும், முறுவலும், ஆசன பத்மத்திலே அழுத்தின திருவடிகளுமாய் நிற்கிற நிலை..

சென்னை - அசோக்நகர் 

கருமாரி ஆலயம்

ஸ்ரீநிவாசர் காளிய மர்த்தனர் திருக்கோலம்

வைணவர்களுக்கு கோவில் என்றளவிலே  அறியப்படுகின்ற திருவரங்கத்தில் பகல் பத்து உற்சவம் எவ்வாறு நடை பெறுகின்றது என்று காண்போம்.  திருக்கையிலே பிடித்த திவ்யாயுதங்களுடனும் அஞ்சல் என்ற கையும் , கவித்த முடியும், பிரசன்ன முகமும், முறுவலும், ஆசன பத்மத்திலே அழுத்தின திருவடிகளுமாய் நிற்கிற நிலையிலே அருட் காட்சி தருகின்ற நம் பெருமாள் கருவறையிலிருந்து காலை 7.15 மணிக்கு புறப்பட்டு சிம்மகதி கண்டருளி துலுக்க நாச்சியார் படி ஏற்றத்துடன் மணிக்கு அர்ச்சுன மண்டபம் எழுந்தருளுகின்றார். அங்கே ஆழ்வார்களும் ஆச்சாரியர்களும் எழுந்தருளியிருக்க,  நாதமுனி வழி வந்த அரையர்கள், தீந்தமிழ் பிரபந்தங்களை தாளத்துடனும், இசையுடனும் ஆழ்வார்கள் முன்னிலையில் அரங்கன் திருமுன்பே அத்யயனம் செய்கின்றனர். சில முக்கிய பாசுரங்கள் வியாக்கியானம் செய்யப்படுகின்றன. அபிநயமும் உண்டு. இயல், இசை, நாடகம் மூன்றும் கலந்த சேவைதான் அரையர் சேவை.

தமிழுக்கு தகமை சேர்க்கும் இந்த உற்சவத்தின் போது தற்சமயம் மூன்று திவ்ய தேசங்களில் மட்டும் தான் அரையர் சேவை தற்போது  நடை பெறுகின்றது. அவையாவன:

வண்டினமுரலும்சோலை மயிலினமாலும் சோலை

கொண்டல்மீதணவும்சோலை குயிலினம்கூவும் சோலை

அண்டர்கோ212பானமரும்சோலை அணிதிருவரங்கம் என்று தொண்டரடிப் பொடியாழ்வார் மங்களாசாசனம் செய்த திருவரங்கம்.

மென்னடையன்னம் பரந்து விளையாடும் வில்லிபுத்தூர் என்று ஆண்டாள் மங்களாசாசனம் செய்த ஸ்ரீ வில்லிபுத்தூர்.

குன்னார்கழனி சூழ் கண்ணன்குறுங்குடி என்று நம்மாழ்வார் மங்களாசாசனம் செய்த திருக்குறுங்குடி. ஆகியவையே இந்த மூன்று திவ்ய தேசங்கள். மற்ற தலங்களில் நாலாயிர திவ்ய பிரபந்தம் சேவிக்கப்படுகின்றது. 

 

அரையர் சேவையுடன் பொதுஜன சேவையும் நடைபெறுகின்றது. மதியம் அலங்காரம், பாவாடை கோஷ்டி, அமுது கண்டருளுகிறார் பெருமாள். மாலை 4.00 மணி முதல் 5.30 மணி வரை பின் பொதுஜன சேவை. மாலை 6.15 மணிக்கு அர்ச்சுன மண்டபத்திலிருந்து கிளம்பி இரவு 9.45 மணிக்கு மூலஸ்தானம் வந்தடைகின்றார் அழகிய மணவாளர். பகல் பத்து நாட்கள் அனைத்திலும் இவ்வாறே சேவை சாதிக்கின்றார் நம் பெருமாள்.

                                        

இன்று பகல் பத்தின் முதல் நாள் பெரியாழ்வார் திருமொழியின் முதல் இரண்டு பத்துக்கள் (212 பாசுரங்கள்) சேவிக்கப்படுகின்றன. பெரியாழ்வாரின் வைபவம் சிறிது பார்ப்போமா? . ஸ்ரீ வில்லிபுத்தூரிலே வட பத்ர சாயிக்கு நந்தவனம் அமைத்து பூமாலை கட்டித்தரும் புஷ்ப சேவை செய்து கொண்டிருந்தார் கருடனின் அம்சமாக அவதரித்த விஷ்ணு சித்தர். ஸ்ரீமந் நாராயணே முழுமுதற் பரம்பொருள் என்று நிரூபித்து பொற்கிழி வென்று பட்டர் பிரான் யானை மீது ஊர்வலமாக வரும் போது வானில் பெரிய பிராட்டியுடன் பெரிய திருவடியில் ஸ்ரீமந் நாராயணன் தோன்ற அவருக்கு கண்ணேறு பட்டு விடுமோ என்று பல்லாண்டு பாடியவர் பெரியாழ்வார். ஆண்டாளின் தந்தை அரங்கருக்கு மாமனார் அவரது பாசுரம் தான் இந்த முதல் நாள் சேவிக்கப்படுகின்றது.

தன்னை யசோதையாக பாவித்து கண்ணனின் லீலைகளை பாடுகின்றார் பெரியாழ்வார். கண்ணன் கேச்வன் நம்பி பிறந்ததைப் பாடி, ஆச்சியரை குழந்தையை வந்து காண் அழைத்து, தாலேலோப் பாடி, சந்திரனை அழைத்து, செங்கீரை ஆடுதலைப் பாடி, சப்பாணி கொட்டச் சொல்லி, தளர் நடையைப் பாடி, பூச்சி காட்டி விளையாடி, முலையுண்ண அழைத்து, காது குத்த, பூச்சூட்ட, நீராட அழைத்து, காக்கையை அழைத்து குழல் வாரக் கூறி, கோல் கொண்டுவர சொல்லி, திருவந்திக்காப்பிட அழைத்து , கண்ணனின் பால லீலைகளைப் பாடியிருக்கின்ற தீந்தமிழ் பாசுரங்களை இன்று சேவிக்கின்றோம்.

 திருவரங்கத்தில்    திருப்பல்லாண்டின் முதற்பாசுரமான 

பல்லாண்டு பல்லாண்டு பல்லாயிரத்தாண்டு 

பலகோடி நூறாயிரம்

மல்லாண்ட திண்டோள் மணிவண்ணா! உன் 

செவ்வடி செவ்விதிருக்காப்பு - என்னும் பாசுரத்தை  அபிநயத்துடன் சேவைக்கும் அரையர் பின்னர் வியாக்கியானத்தையும் அருளுகின்றார்.

மற்ற தலங்களில் 3 மணியளவில் பெருமாள் விஷேச அலங்காரத்தில் சேவை சாதிக்க ஆழ்வார்கள் ஆச்சாரியர்களுக்கு அருளப்பாடு ஆகி  பெரியாழ்வாரின் திருப்பல்லாண்டு மற்றும் பெரியாழ்வார் திருமொழி  சேவிக்கப்படுகின்றது.

சிம்ம கதி மற்றும் சர்ப்ப கதி:
நம்பெருமாள் பகல் பத்து 10 நாட்களும் காலை புறப்பாட்டின்போது மூலஸ்தானத்திலிருந்து வெளியே வரும்போது ஒரு சிங்கத்தைப்போல் பாய்ந்து கொண்டு வெளியில் வருவார், இதற்கு சிம்ம கதி எனப்பெயர். அதேபோல் இரவு மூலஸ்தானத்திற்கு செல்லும்போது லேசாக ஒரு பாம்பைப் போல் வளைந்து நெளிந்து உள்ளே செல்வார் அதற்கு சர்ப்ப கதி எனப்பெயர்.

அத்யயனோற்சவம் - 1

இத்தொடரின் மற்ற பதிவுகளையும் காணுங்கள்

2    3    4     5    6    7     8    9    10    11    12    13    14    15    16    17    18    19   20   21   22     

அரங்கநகரப்பன் 

மயர்வற மதி நலம் பெற்ற ஆழ்வார்களின் அருளிச்செயல்களை அந்த ஆதி மூலனின் முன் சேவை செய்யும் உற்சவமே அத்யயனோற்சவம். 

மாதங்களில் நான் மார்கழி என்று கிருஷ்ண பெருமானால் சிறப்பிக்கப் பெற்ற தேவர்களின் அதிகாலை நேரமான மார்கழி மாதத்தில் வைணவ திருத்தலங்களில் கொண்டாடப்படும் உற்சவமே அத்யயனோற்சவம். 

தமிழுக்கு தகமை செய்யும் விழா, இயல், இசை, நாடகம் மூன்றுக்கும் பெருமை சேர்க்கும் உற்சவமே அத்ய்ய்யனோற்சவம். 

முப்பத்து முக்கோடி வைகுண்ட ஏகாதசியை மையமாக கொண்டுள்ள உற்சவமே அத்யயனோற்சவம். 

சரணாகதி தத்துவத்தை தத்ரூபமாக விளக்கும் உற்சவமே அத்யயனோற்சவம். 

திருவரங்கத்தில் திருமங்கையாழ்வார் தங்கியிருந்த போது பொங்கோதம் சூழ்ந்த புவனியும் விண்ணுலகும் அங்கதுஞ்சோரமே ஆள்கின்ற, அரங்கநாதர் முன் திருநெடுந்தாண்டகம் சேவித்தார் (ஓதினார்), அதனால் மிகவும் பிரசன்னமான பெருமாள் ஆழ்வாரை ஏதாவது வரம் வேண்டுமாறு கூற, அவரும் புரட்டாசி மாதம் நடைபெறுகின்ற அத்யயன உற்சவத்தின் போது வேதங்களுடன், நம்மாழ்வாரின் திருவாய்மொழியும் சாற்றுமுறை செய்ய அருள் புரிய வேண்டும் என்று வேண்ட பெருமாளும் அவ்வண்ணமே அருளிச் செய்தார். முதன் முதலாக திருமங்கை மன்னரே திருவாய் மொழிப் பாசுரங்களை நம்பெருமாள் முன் சேவித்தார். அதன் பின்னர் மார்கழி திருமாதத்தின் வைகுண்ட ஏகாதசியின் போது நாலாயிர திவ்விய பிரபந்தமும் சாற்றுமுறை செய்யப்படலாயிற்று. 

மன்னு பெரும்புகழ் மாதவன், மாமணிவண்ணன், மாய கூத்தன், மால் வண்ணன், மலர்மிசை நாயகன், மண்மகள், திருமகள், ஆய்மகள் அன்பன், இவ்வுலத்தில் உள்ளோர் எல்லாம் உய்யும் பொருட்டு வேதங்கள் மற்றும் பகவத் கீதையின் சாரங்களை பாமரரும் புரிந்து கொள்ள " கலைகளும் வேதமும் நீதி நு‘லும் கற்பமும் சொற்பொருள் தானும் நீர்மையினால் அருள் செய்தான்". அவனே ஆழ்வார்களுக்கு மயர்வற மதிநலம் அருளி தெள்ளு தமிழில் சிறந்த பாடல்களை பாடச்செய்தான். பெரியாழ்வார், ஆண்டாள் நாச்சியார், குலசேகராழ்வார், திருமழிசையாழ்வார், தொண்டரடிப்பொடியாழ்வார், திருப்பாணாழ்வார், மதுரகவியாழ்வார், திருமங்கையாழ்வார், பொய்கையாழ்வார், பேயாழ்வார், பூதத்தாழ்வார் மற்றும் நம்மாழ்வாரின் அருளிச் செயல்களே நாலாயிர திவ்ய பிரபந்தம். சந்த தமிழ் மறையாம் திவ்ய பிரபந்தம் ஓதப்படும் திருவிழாவே அத்ய்யனோற்சவம். 

பூலோக வைகுண்டமாம் திருவரங்கத்தில் அத்யயனோற்சவம் தொடக்கமாக  திருமங்கை மன்னனின் திருநெடுந்தாண்டகம் சேவிக்கப்படுகின்றது. இரவு ஏழு மணிக்கு கர்ப்பகிரஹத்தில் திருநெடுந்தாண்டகம் சேவிக்கின்றனர். முதல் இரவு ஒன்பது மணி வரை சந்தன மண்டபத்தில் திருநெடுந்தாண்டகம் அபிநயமும், வியாக்யானமும் நடக்கின்றது. 

திருநெடுந்தாண்டகத்தின் முதல் பாசுரமான 

மின்னுருவாய் முன்னுருவில் வேதம் நான்காய் 

     விளக்கொளியாய் முளைத்தெழுந்த திங்கள் தானாய் . . . .  என்னும் பாசுரம் அபிநயத்துடன் அரையர் சேவிக்கின்றார் பின்னர் வியாக்கியானமும் அருளுகின்றார்.

 

இரவு 9 மணிக்கு திருப்பணியாரம் அமுது செய்தல் தொடர்ந்து கோஷ்டி. திருவாரதனம் நிகழ்ச்சிகள் முடிந்து . திருக்கொட்டாரத்திலிதுந்து சிறப்பு அலங்காரம். இரவு 11 மணியிலிருந்து 11.30 வரை தீர்த்த கோஷ்டி என்று அத்யயனோற்சவம் சிறப்பாக தொடங்குகிறது. 

இந்த உற்சவத்தின் போதுதான் பன்னிரு ஆழ்வார்களுடன் அழகிய மணவாளப்பெருமாளுடன் ஒன்றாக ஒரே இடத்தில் சேவிக்க இயலும்.

நம்பெருமாளின்  படங்கள் ஜெயா ஸ்ரீதர் மூலமாக பெற்று   அனுப்பியவர்  அடியேனது நண்பர் மாணிக் அவர்கள் அவருக்கு மிக்க நன்றி.  ஸ்ரீநிவாசரது படங்கள் சில ஆண்டுகளுக்கு முன் எடுத்தவை.