திருமயிலை கபாலீச்சுரம் -2

ஆடும் மயிலாய் உருவெடுத்து அர்சித்த நாயகி கற்பகாம்பாள்

நவராத்திரி கொலு தர்பார் காட்சி

முதற்பதிவில் மயிலாப்பூரின் பல்வேறு நாமங்களையும் அதற்கான காரணங்களையும் கண்டோம். இப்பதிவில் திருமயிலாப்பூர் என்னும் திருநாமம் வரக்காரணமான அம்மையப்பரின் திருவிளையாடளையும், இத்திருவிளையாடல் பல் வேறு இடங்களில், நிகழ்ச்சிகளில் எப்படி இடம் பெறுகின்றது என்பதையும் காணலாம் அன்பர்களே.

ஒரு தூண் சிற்பத்திலே முழுக்கோவில்

ஒரு தூணின் ஒரு பக்கத்திலே இத்தலத்தையே சித்தரித்துள்ள சிற்பியின் திறமையை என்ன என்று சொல்ல, திருமயிலையின் கிழக்கு கோபுரம் 7 நிலை நெடிதுயர்ந்த இராஜகோபுரம். மேற்கு கோபுரம் மூன்று நிலை சிறிய கோபுரம். இந்த தூண் சிற்பத்தின் மேல் பகுதியில் 7 நிலை இராஜ கோபுரத்தையும் கீழ் பகுதியில் மூன்று நிலை இராஜ கோபுரத்தையும் காண்கின்றீர்கள். மேலும் புன்னை மரத்தடியில் ஈசனை அன்னை அர்சிக்கும் காட்சியையும் காண்கின்றீர்கள். இன்னும் ஒரு நுணுக்கமும் உள்ளது இச்சிற்பத்தில் மேற்கு கோபுரத்தில் நுழைந்தவுடன் ஐயனின் திருமுக தரிசனம் கிடைக்கும் என்பதையும், கபாலீஸ்வரப்பெருமானின் அருவுருவ லிங்கத்திருமேனி சத்யோஜாதம் எனப்படும் மேற்கு நோக்கிய திருமேனி. இத்தி்ருமேனியில் தாரை ஐயனின் வலப்பக்கம் இருக்கும், இச்சிற்பத்திலும் சிற்பி அவ்வாறே வடித்துள்ளார். இச்சிற்பத்தை நவராத்திரி மண்டபத்தின் ஒரு தூணில் காணலாம்.



இந்த சிற்பத்திலே ஐயனின் திருமேனி சத்யோஜாத மேனி, மேலே உள்ள மலர் மாலை, மயிலுருவில் சிவ பூஜை செய்யும் அன்னையின் அலகில் உள்ள புன்னை மலர், புன்னை மரத்தின், இலை, மலர்,காய், வணங்கி நிற்கும் அன்பர்கள் அனைவருமே அப்படியே தத்ரூபம், அன்று நடந்ததை இன்று நம் கண் முன் கொண்டு வந்து காட்டும் அற்புத நிவந்த கல்வெட்டின் சிற்பம். அன்னை கற்பகாம்பாளின் சன்னதிக்கு முன்னர் இச்சிற்பத்தைக் காணலாம்.

கருணைத்தெய்வம் கற்பகாம்பாள் மாதா மாதம் நிறை வெள்ளியன்று ஊஞ்சல் சேவை தந்தருளும் ஊஞ்சல் மண்டபத்தில் ஒரு தூணில் உள்ளது இச்சிற்பம். இவ்வாறு சிற்பிகள் செதுக்கிய இவ்வரலாறு என்ன, இத்தலம் மயிலாப்பூர் என்றழைக்கப்படும் காரணம் என்பதை அறிந்து கொள்ள ஆர்வமாக உள்ளதா? அந்த அம்மையப்பரின் நாடகத்தை கீழே காணுங்கள்.

ஒரு சமயம் பக்திப் பனியாய்க் கவிந்து இப்பாருலகத்தை காக்கும் பரமனுலகாம் கயிலங்கிரியில் சிவபெருமான் அம்மை பார்வதிக்கு, மலை மகளுக்கு, கௌரிக்கு, உமையம்மைக்கு ஓங்காரத்தின் தத்துவத்தை உபதேசம் செய்து கொண்டிருந்தார், அப்போது அம்மை அங்கு ஆடிக் கொண்டிருந்த மயிலை ஆர்வத்துடன் நோக்க கோபம் கொண்ட ஐயன் அம்மையை பூவுலகில் சென்று மயிலாக பிறக்குமாறும் தக்க சமயத்தில் வந்து ஆட்கொள்வதாகவும் கூறினார். அம்மையும் மயிலாப்பூர் வந்து புன்னை வனத்தில் புள்ளி மயில் உருவில் மாசக்தி அன்னை பிரணவ வடிவுடன் வாழ்ந்து கொண்டிருக்கும் போது கயிலை நாதராம் சிவபெருமான் அன்னை இல்லாமல் தவித்தார் சக்தி இல்லாமல் சிவம் ஏது, அவரே இப்பூவுலகம் வந்தார். ஒரு புன்னை மரத்தடியில் சிவலிங்க உருவுடன் அமர்ந்து அன்னையின் பூஜைக்காக காத்துக்கொண்டிருந்தார். மயில் உருவில் இருந்த அன்னை வாவியில் நீராடி ,தன் அலகினால் புன்னை மலர்களை எடுத்து சிவலிங்கத்தை சுற்றி வந்து அலகிலிருந்த மலர்களை இறைவனுக்கு அர்ச்சனை செய்து பூஜை செய்தாள் அம்மையின் பூஜையினால் பிரசன்னமான ஐயன் அம்மையை ஆட்கொண்டு இருவரும் அத்தலத்திலேயே , அம்மை வேண்டுவனருக்கு வேண்டும் வழங்கும் கற்பகாம்பாளாகவும், ஐயன் பிச்சாண்டியாக கபால நாதனாக கபாலீசுவரராகவும் திருக்கோவில் கொண்டனர். இப்பூவுலகத்தில் மாந்தர்களை உய்விக்க அம்மையும் ஐயனும் ஆடிய இந்த நாடகத்தை

ஆடும் மயிலாய் உருவெடுத்து அன்று இறைவன் திருத்தாள்

நாடி அர்சித்த நாயகியாம் நின் நின் நாமங்களைப்

பாடி உருகிப் பரவிப் பரவசம் ஆகும் அப்பாங்கு அருள்வாய்

காடெனவே பொழில் சூழ் மயிலாபுரி கற்பகமே!

என்றுப் பாடிப் பரவுகின்றனர் அடியார்கள்.

புன்னை வன நாதர் சன்னதி

திருக்கோவிலின் தலமரமான புன்னை மரத்தின் நிழலில் அமைந்துள்ளது புன்னை வன நாதர் சன்னதி. இச்சன்னதியில் அன்னை சிவ பூஜை செய்யும் கோலத்தில் அருள் பாலிக்கின்றாள். பழமை வாய்ந்த இம்மரத்தில் மஞ்சள் சரடு கட்டி மாங்கல்ய பாக்கியம் வேண்டியும், தொட்டில் கட்டில் குழந்தை பாக்கியம் வேண்டியும் அம்மையப்பரை வணங்குகின்றனர் பக்தர்கள்.

மயில் உருவில் அன்னை

பூத்துக்குலுங்கும் புன்னை மரம்

பங்குனி பௌர்ணமியின் போது திருக்கல்யாணத்திற்கு முன்பு இந்த மயிலாப்பூர் ஐதீகம் புன்னை வன நாதர் சன்னதியில் அரங்கேறுகின்றது. ஐயன் மண்டபத்திலி்ருந்து( திருக்கயிலாத்திலிருந்து) கிளம்பி வந்து அன்னை மயிலுருவில் பூஜை செய்யும் அழகை பார்த்து சொக்கி நிற்கின்றார். அன்னைக்கு தீபாராதணை ஆனவுடன் திரைச்சீலை விலக அங்கே புதுமணப்பென்ணாக சுய உருவில் கற்பகாம்பாள் அருட் காட்சி தருகின்றாள். அன்னைக்கு சிறப்பு பூஜைகள் நடைபெற்று பின்னர் அன்னை ஐயனை சுற்றி வந்து வணங்க பின்னர் இருவருமாய் கல்யாண மண்டபத்துக்கு எழுந்தருளி நாம் எல்லோரும் உய்ய திருக்கல்யாணம் நடைபெறுகின்றது.

மேலே கற்சிற்பங்களின் அம்மையப்பரின் நாடகத்தை கண்டு களித்தோம் இனி சுதை சிற்பங்களில் அதைக் கண்டு மகிழ்வோமா?

வாணியர் மண்டபத்தின் சுதை சிற்பம்

இராஜ கோபுரத்தின் சுதை சிற்பம்

மேற்கு கோபுர வாயிலில் நுழைந்தவுடன் தரிசிக்கும் சுதை சிற்பம்

அம்மையப்பரின் இந்த நாடகத்தால் இரண்டு பெருமைகளைப் பெற்றது. ஒன்று தொண்டின் பெருமை, இன்னொன்று இல்லை எனாது யாவர்க்கும் கற்பகமாய் அன்னை அருள் வழங்கும் பெருமை.

இனி மயிலாப்பூர் என்ற பெயர் வரக்காரணம், அம்மை மயிலாக பூசை செய்ததால் மயிலை என்ற பெயர் ஏற்பட்டது. மேலும் புன்னை வனத்தில் மயில்கள் நிறைந்திருந்து மயில்கள் அகவிய வண்ணம் இருந்ததால் மயிலாப்பு என்று திருநாவுக்கரசரால் அழைக்கப்பட்டு இன்றைக்கு மயிலாப்பூர் என்று அழைப்படுகின்றது என்போரும் உண்டு. இந்தியாவில் சுற்றுப்பயணம் செய்த கிரேக்க அறிஞர் தாலமி (காலம் கி.பி 119 -கி.பி 161) இத்தலத்தை தமது பயண நூலில் மலியார்பா என்று குறிப்படுகின்றார் "வடிவுடைய மங்கையுந் தாமுமெல்லாம் வருவாரை யெதிர் கண்டோம் மயிலாப்புள்ளே என்று” அப்பர் பெருமான் பாடியுள்ளார். 5ம் நூற்றாண்டில் திருமழிசை ஆழ்வார் "மாமயிலை" என்றும், 7ம் நூற்றாண்டில் திருஞான சம்பந்தர் "மட்டிட்ட புன்னையங்கானல் மடமயிலை" என்றும், திருமழிசை ஆழ்வார் "மாடமாமயிலை" என்றும் குறிப்பிடுகின்றார்.

பங்குனிப்பெருவிழாவின் முதல் நாள் இரவு ஐயன் ஸ்தல விருட்சமான புன்னை மர வாகன சேவை தந்தருளுகின்றார். அப்போதும் அன்னை மயிலுருவில் சிவ பூஜை செய்யும் கோலத்தில் கபாலீஸ்வரப்பெருமான் எழுந்தருளி அருள் பாலிக்கும் கோலம். முன்னே மயிலைக் காண்கிறோம். பின்னே உள்ளுறைப் பொருளாய் அன்னை. சகல ஜீவராசிகளிலும் உறைபவள் அவள் தான் என்பதை உணர்த்தவா இந்த நாடகம் நடந்தேறியது.

அன்னை சிவபூஜை செய்யும் ஓவியம்

திருஞான சம்பந்தரின் பதிகங்கள் மற்றும் திருமழிசை ஆழ்வாரின் பாசுரங்கள் அருணகிரி நாதரின் திருப்புகழ் முதலியவற்றில் கபாலீச்சுரம் முற்காலத்தில் கடற்கரையோரம் இருந்திருக்கின்றது என்று தெரிகின்றது, கடல் கொண்டதாலோ அல்லது போர்ச்சுகீசிரியர்கள் காலத்தில், (1565 ல் போர்ச்சிக்கீசியப் போரில்) அவ்வாலயம் அழிக்கப்பட்டு தற்போது உள்ள இடத்தில் 16ம் நூற்றாண்டில் கட்டப்பட்டுள்ளது.

மின் விளக்கு ஒளியில்

சாந்தோம் தேவாலயத்தில் 1923ம் ஆண்டில் நடந்த ஒரு அகழ்வாராய்ச்சியின் போது புராண திருக்கோவிலின் தூண்கள் மற்றும் இராஜ இராஜ சோழரின் சில கல்வெட்டுக்கள் கிடைத்துள்ளன. தற்போதைய கோவிலின் தூண்கள் விஜய நகர பாணியில் உள்ளன.

திருமயிலை பெருமைகள் வளரும்

திருமயிலை கபாலீச்சுரம் -1

கற்பகவல்லி நின் பொற்பதங்கள் பிடித்தேன் நற்கதி அருள்வாய் அம்மா

ஒன்றாய் அரும்பி பலவாய் விரிந்து இந்த புவனமனைத்தையும் படைத்தும், காத்தும், அழித்தும், மறைத்தும், அருளியும் அலகிலா விளையாட்டுடை பஞ்ச கிருத்ய பராயணனாய், எல்லா உலகங்களுக்கும் நாயகனாய் , விறகில் தீயும், பாலில் படு நெய்யும் போல எங்கும் நிறைந்துள்ள அந்த சிவப்பரம்பொருள் நாம் எல்லோரும் உய்ய அருவமும் உருவமுமாகி லிங்கத்திருமேனியும், பல்வகை திருவுருவங்களும் தாங்கி பரத கண்டம் முழுவதும் எழுந்தருளி அருள் பாலிக்கும் திருத்தலங்கள் அனேகம், அவற்றுள் 12 ஜோதிர்லிங்கத் தலங்கள் மிகவும் சிறப்பு மிக்கவை. நமது தமிழ் நாட்டிலே சாக்கியர்களாலும், ஜைனர்களாலும் நமது சைவ சமயத்திற்கு இடர் வந்த போது இறையருளால் தோன்றி சைவ சமயத்திற்கு புத்துயிர் ஊட்டிய ஆளுடையப் பிள்ளை என்னும் திருஞான சம்பந்தர், அப்பர் என்னும் திருநாவுக்கரசர், மற்றும் வன் தொண்டர் என்றும் சுந்தரர் ஆகிய மூவராலும் பாடல் பெற்ற தலங்கள் தேவாரத்தலங்கள் என்றும் பாடல் பெற்ற தலங்கள் என்றும் போற்றப்படுகின்றன.

தருமமிகு சென்னையில் சென்னையில் பாடல் பெற்ற தலங்கள் மூன்று அவை மூன்றும் கடற்கரையோரம் அமைந்துள்ளன. வடக்கிலே திருவொற்றியூரும், மத்தியிலே திருமயிலையும், தெற்கிலே திருவான்மியூரும் அமைந்துள்ளன. இந்த மூன்று தலங்கள் இவற்றுள் நடு நாயகமாக அமைந்த திருமயிலையே நாம் காணப்போகும் தலம்.

ஆடும் மயிலாய் உருவெடுத்து அர்சித்த நாயகி கற்பகாம்பாள்

இந்த திருத்தலத்தின் பெருமைகளை எப்படித்தான் கூறுவது. அன்னை பார்வதியாரே தன் கால் பதித்து நடந்து மயில் வடிவம் கொண்டு சிவ பூஜை செய்த பரம பவித்திர பூமி இது அன்னை மயிலுருவில் பூஜை செய்ததால் மயிலாப்பூர் என்றழைக்கப்படும் தலம்.

சிங்கார வேலவர் சூரபத்மனை அழிக்க மயிலை நாதனை பூசித்து அம்மையிடம் சக்தி வேல் பெற்ற தலமானதால் கந்தபுரி என்று அழைக்கப்படும் ஸ்தலம்.சிங்கார வேலவர் அருணகிரி நாதரால் திருப்புகழ் பெற்ற தலம்.

புன்னை மரத்தடியில் அம்மை சிவபூஜை செய்ததால் புன்னை வனம்.

பிரம்மன் பூசித்து தன் இறுமாப்பு நீங்கி படைக்கும் ஆற்றலைப் பெற்ற தலமானதால் பிரம்மபுரி .

வேதங்கள் (மறைகள்) பூசித்து அரசு தொடுகையால் உண்டான பாவத்தைப் போக்கிய தலம் எனவே இத்தலம் வேதபுரி (வேத நகர்) என்றும் அழைக்கப்படுகின்றது.

திருமயிலை கிழக்கு இராஜகோபுரம்

இறைவன் மேற்கு முகமாய் (சத்யோஜாத மூர்த்தமாய்)கபாலீஸ்வரராய் எழுந்தருளி அருள் பாலிப்பதால் கபாலி நகரம் என்றும் அழைக்கப்படுகின்றது திருமயிலை.

எலியாக இருந்த போது திருமறைக்காட்டிலே எம்பெருமானின் கருவறையின் தீபத்தை தூண்டியதால் அடுத்த பிறவியில் அசுர ராஜனாக பிறந்த பலி சக்கரவர்த்தியிடம், மஹா விஷ்ணு வாமன அவதாரத்தில் வந்து மூவடி மண் கேட்ட போது அதை தடுக்க முயன்று கண்ணை இழந்த அசுர குரு சுக்கிராச்சியார் வழிபட்டு இழந்த கண்ணைப் பெற்ற தலம் எனவே இத்தலம் சுக்கிரபுரி என்றும் அழைக்கப்படுகின்றது.

இராமர் வழிபட்டு பகைவரை வென்று மனைவியை அடைந்த தால் தானே திருவிழா நடத்திய தலம்.

அம்மையின் ஞானப்பாலுண்ட திருஞானசம்பந்தர் சிவநேச செட்டியாரின் மகள் என்பை பூம்பாவை ஆக்கிய தலம், இன்றும் அந்த நிகழ்வை அறுபத்து மூவர் திருவிழாவாக கொண்டாடும் தலம்.

திருமயிலை ஐதீகங்கள்

தன் மனதையே ஞானக் கோவிலாகக் கொண்டு வழிபட்டு முக்தி அடைந்த வாயிலார் நாயனார் வாழ்ந்த தலம்.

மாலவன் புகழ் பாடிய பன்னிரண்டு ஆழ்வார்களுள் மூன்றாவது ஆழ்வாரான பேயாழ்வார் அவதரித்த தலம்.

உலகப் பொது மறையாம் திருக்குறளை வழங்கிய வள்ளுவர் வாசுகியுடன் வாழ்ந்த தலம்.

திருமயிலை என்றும், மாமயிலை என்றும் மயிலாப்பூர் அழைக்கபடும் திருமயிலை கபாலீச்சுரம் தான் இவ்வளவு பெருமைகள் பெற்ற தலம்.

கற்பகமும் கபாலியும்

பல்லாடு தலைசடை மேலுடையான் தன்னைப்

பாய்புலித்தோ லுடையானை பகவன் தன்னை

சொல்லோடு பொருளனைத்து மானான் தன்னைச்

சுடருருவில் என்பறாக் கோலத் தானை

அல்லாத காலனை முன் நடர்த்தான் தன்னை

ஆலின் கீழ் இருந்தானை அமுதானானைக்

கல்லாடை புனைந்தருளும் காபாலியைக்

கற்பகத்தைக் கண்ணாரக் கண்டேன் நானே.

என்று அப்பர் பெருமான் பாடியபடி ஐயன் கபாலியாகவும் அம்மை கற்பக வல்லியாகவும் எழுந்தருளி அருள் பாலிக்கும் , "மயிலையே கயிலை, கயிலையே மயிலை" என்னும் திருமயிலையில் இன்று தொடங்கி பங்குனி பௌர்ணமி வரை பங்குனிப்பெருவிழா சிறப்பாக நடைபெறும் இச்சமயத்தில் மயிலாப்பூர் திருத்தலத்தின் பெருமைகளைப்காண்போமா அன்பர்களே?

திருமயிலையின் சிறப்பே அதன் திருவிழாக்கள் தான் இத்தலத்தின் பல்வேறு திருவிழாக்களைக் காணாமல் போதியோ? பூம்பாவாய் என்று பதிகம் பாடித்தான் திருஞான சம்பந்தர் இறந்த பின் சாம்பலும் எலும்புமாக இருந்த பூம்பாவையை அங்கத்துடன் உயிருடன் எழுப்பினார் எனவே இத்தொடரில் இத்தலத்தின் பல்வேறு திருவிழாக்களின் தரிசனங்கள் இடம் பெறும் அனைவரும் வந்து தரிசித்து அருள் பெற வேண்டுகிறேன்.

குறிப்பு: திருமயிலை என்று ஒரு வலைப்பூவையும் அடியேன் ஆரம்பித்தேன் நேரமின்மையின் காரணத்தினால் முழுவதுவதுமாக தொடர முடியவில்லை இனி மேல் திருமயிலையின் சிறப்புகள் இப்பதிவில் தொடரும்.

மாசி கடலாட்டு காணாதே போதியோ?

மடலார்ந்த தெங்கின் மயிலையார் மாசிக்
கடலாட்டுக் கண்டான் கபாலீச் சரமமர்ந்தான்
அடலானே றூரு மடிக ளடிபரவி
நடமாடல் காணாதே போதியோ பூம்பாவாய்
கபாலீச்சரம் அமர்ந்தான் கடலாட்டு
காணும் அற்புத காட்சி

பொருள்: பூம்பாவாய்! மடல்கள் நிறைந்த தென்னை மரங்கள் நிறைந்த மயிலாப்பூரில் மாசி மக நாளில் கடலாட்டுக் கண்ட களிப்பொடு கபாலீச்சரம் என்னும் கோயிலில் எழுந்தருளியிருப்பவனும், வலிமை பொருந்திய ஆனேற்றில் ஊர்ந்து வருபவனும் ஆகிய இறைவன் புகழ் பரவி அப்பெருமானது நடனமாடும் காட்சியைக் காணாது செல்வது முறையோ? என்று அம்மையின் ஞானப்பாலுண்ட ஆளுடையப்பிள்ளையாம் திருஞானசம்பந்தர் திருமயிலையில் எலும்பை பெண்ணாக்கிய அற்புதம் செய்த போது பாடிய இப்பதிகத்தில் கபாலீஸ்வரப் பெருமானின் பல்வேறு திருவிழாக்களில் மாசி கடலாட்டு விழாவை காணாமல் போகலாமா? என்று வினவுகிறார். இவ்வளவு சிறப்புப் பெற்ற அந்த மாசி மக கடலாட்டு விழாவைப் பற்றிக் இப்பதிவில் காண்போமா அன்பர்களே?

சென்னை சைதை செங்குந்தக் கோட்டம்
சிவசுப்பிரமணிய சுவாமி ஓம் என்னும் பிரணவத்தில்
வெள்ளி மயில் வாகன சேவை

மாசி மாதம் முழுமதியும் மக நட்சத்திரமும் இணைந்து வரும் நன்னாளில் மாசி கடலாட்டு, தீர்த்த வாரி, தீர்த்தம் கொடுத்தல், மாசி மகம் என்றெல்லாம் அழைக்கப்படும் இத்திருவிழா தமிழகமெங்கும் வெகு விமர்சையாக நடைபெறுகின்றது. கன்னியாகுமரி முதல் சென்னை வரை கடற்கரையோரம் அமைந்த திருக்கோவில்களின் அனைத்து உற்சவ மூர்த்திகளும் கடலுக்கு எழுந்தருளி தீர்த்தவாரி கண்டருளுகின்றனர். ஆற்றங்கரையில் அமைந்த திருக்கோவில்களின் மூர்த்திகள் ஆற்றுக்கு எழுந்தருளி தீர்த்தம் கொடுக்கின்றனர். மற்றும் பல் வேறு திருக்குளங்கள் முதலான நீர் நிலைகளில் மாசி மக தீர்த்தம் கொடுத்தல் சிறப்பாக நடைபெறுகின்றது. கும்பகோணத்தில் பன்னிரண்டு ஆண்டுகளுக்கு கொண்டாடப்படும் மஹாமகமும் இந்த மாசிமக விழாதான்.

செங்குந்த கோட்டம் சிவ சுப்பிரமணிய சுவாமி

ஒவ்வொரு மாதத்திற்கும் ஒவ்வொரு நட்சத்திரம் சிறந்தது போல, மாசியில் சிறந்து விளங்குவது மக நட்சத்திரம். ஏன் இப்படி என்று ஆராய்ந்தால், நமது முன்னோர்கள் ஒவ்வொரு தமிழ் மாதத்திலும் "பௌர்ணமி' திதி வரும் நன்னாளில் என்ன நட்சத்திரம் உள்ளதோ, அதையே அந்த மாதத்தின் பெயராகவும் வரும்படி அமைத்துள்ளார்கள். (உதாரணமாக சித்திரை மாதத்தில் வரும் பௌர்ணமி, சித்திரை நட்சத்திரத்தில் உதிப்பதால் அந்த மாதத்திற்கு "சித்திரை' என்று பெயர்). அந்த வரிசையில் மாசி மாதம் வரும் பௌர்ணமியில் மக நட்சத்திரம் பிறப்பதால், இந்தத் தமிழ் மாதம் "மாக மாதம்' (மாசி) என்று பெயர் பெற்றது.

சிவசுப்பிரமணிய சுவாமி

பொதுவாகவே ஆலயங்களிலே திருவிழாக்களைத் தொடங்குவது அல்லது விழாக்கள் கொண்டாடுவது ஒரு முழுமதி திகழும் நன்னாளாகவே அமையும். அவ்வகையில் இந்த மாசிமாதம் மக நட்சத்திரத்தில் நடைபெறும் மகத்திருவிழா, - தலம், மூர்த்தி, தீர்த்தம் என்ற மூன்றினில் தீர்த்தத்துக்கு முக்கியத்துவம் அளிக்கப் பெறும் விழாவாக அமைந்துள்ளது. இதனை "மாக ஸ்நானம்' என்று சிறப்பித்துக் கூறுவார்கள்.

ரிஷபாரூடராக மகிழடி சேவை
சாதிக்கும் சிவசக்தி - திருவொற்றியூர்

புராணங்களும் இந்நன்னாளைப் போற்றுகின்றன. மனிதர்கள் தங்கள் பாவங்களைப் போக்கிக் கொள்ளும் வழிகளில் மாசி மகப் புனித நீராடலும் ஒன்று. மாசி மகத்தில் புண்ணிய தீர்த்தங்களைத் தரிசிப்பதும் தொடுவதும் பருகுவதும் அதில் நீராடுவதும் புண்ணியத்தைத் தரும்; பாவங்கள் தொலையும். இத்தினத்தில் தீர்த்தக் கரைகளில் தர்ப்பணம், பிதுர்க்கடன் ஆகியவை செய்தால், அவர்கள் பாவங்கள் நீங்கி நற்கதி பெறுவர் என்பது நம்பிக்கை.

மயிலை விருபாக்ஷீஸ்வரர்

மாசி மக கடலாட்டு விழா கொண்டாட்டத்திற்காக சில ஐதீகங்கள் உள்ளன அவை என்னவென்று பார்ப்போமா? தில்லை சிற்றம்பலமாம் சிதம்பரத்திற்கு வடகிழக்கே , கிள்ளையில் கடற்கரையில் உள்ளது குய்ய தீர்த்தம். இருளில் வந்த குருவை வருணன் பகைவன் என்று எண்ணி அவர் மீது பாசத்தை விட அதனால் அவர் இறந்தார். வருணனை அக்கொலைக் குற்றம் பற்றியது எனவே ஒரு பிசாசு அவனுடைய காலையும் கையையும் கழுத்துடன் கட்டி கடலில் இட்டது. வருணனும் நீண்ட காலம் அங்கு கிடந்தான். அதானால் பூமியெங்கும் மழை இல்லாமல் போனதால் தேவர்கள் வேண்ட அவ்வாறு கிடந்த வருணனுக்கு விமோசனம் அளிக்க பரம கருணாமூர்த்தி சிவபெருமான் ஒரு மாசி மக நாளில் இத்துறைக்கு எழுந்தருளி அப்பாசக் கட்டு அற்றுப் போகும் படி அருள் புரிந்தார் எனவே இத்துறை "பாசமறுத்ததுறை" என்றும் பெயர் பெற்றது அன்று முதல் மாசி மக நாளன்று அனைத்து தெய்வ மூர்த்தங்களும் கடலுக்கு எழுந்தருளும் கடலாட்டு விழாவும் துவங்கியது.

கல்யாண சுந்தரர் - சங்கிலி நாச்சியார்
திருக்கல்யாணக் கோலத்தில்

இன்னுமொரு ஐதீகம். ஒரு சமயம் திருக்கயிலையிலே ஐயனுக்கும் அம்மைக்கும் இடையிலே ஒரு பிணக்கு . அருளே தன் உருவம் என்று கூறிய அம்மையின் தற்பெருமையினால் உலக இயக்கம் ஒரு விநாடி நின்றது. தவறை உணர்ந்தாள் அன்னை பிராயசித்தமாக தக்ஷப்பிரஜாபதியின் தவத்தின் பயனாக அவருக்கு மகளாகப் பிறந்து தாக்ஷாயணி என்ற பெயருடன் வளர்ந்து, தவம் செய்ய, தான் வந்து மணம் முடிப்பதாக ஐயன் வரமளித்தார். எனவே ஒரு மாசி மக நாளன்று அம்பிகை வலம்புரி சங்கு வடிவில் தாமரை மலரில் வடிவெடுத்தாள். அன்று காளிந்தி நதிக்கு நீராட தன் மனைவி வேதவல்லியுடன் வந்த தக்ஷன் சங்கை கையில் எடுக்க அது ஒரு அழகான குழந்தையாக உருமாறியது. ஆகவே அன்னையின் ஜென்ம தினம் இந்த மாசி மக நாள் இன்னாளில் விரதம் இருந்து அன்னையை வழிபட திருமணப்பேறு கிட்டும்.

திருமயிலை வாலீஸ்வரர்

மாசி மகத்திற்க்கு மிகவும் பெயர் போனது கும்பகோணம் ஏனென்றால் பன்னிரண்டு ஆண்டுகளுக்கு ஒரு முறை சிம்ம இராசியில் குருவும் சந்திரனும் ஒன்றாக சேர்ந்து இருக்க , சிம்ம ராசியின் ஏழாவது வீடான கும்ப ராசியில் சூரியன் இருந்து சிம்ம ராசியில் உள்ள குருவையும் சந்திரனையும் பார்க்கும் அமைப்பில் மாசி மாதத்தில் மக நட்சத்திரத்தில் சந்திரன் முழு நிலவாக ஒளிர்வான் இந்த நாள் தான் மஹாமகம் தினம்.

திருமயிலை வீரபத்திரர்
( ஆட்டுத்தலையுடன் தக்ஷன்)

இன்றைய தினம் கங்கை, யமுனை, நர்மதா, சரஸ்வதி, கோதாவரி, துங்கபத்ரா, கிருஷ்ணா, சரயு என்னும் ஒன்பது நதிகளும் மஹாமக குளத்தில் நீராடி தங்கள் பாபங்களை போக்கி கொள்கின்றனர். , இந்தக் குளத்தில் நீராடினால் சகல தீர்த்தங்களிலும் நீராடிய புண்ணியம் கிடைக்கிறது.

திருமயிலை ஏகாம்பரேஸ்வரர்
தீர்த்தவாரி பாலாபிஷேகம்

பாவங்கள் தொலைகிறது. அன்று நாம் மஹாமக குளத்தின் நடுவில் உள்ள கன்னியா குளத்தில் நீராடி குளக்கரையில் நம் முன்னோர்களுக்கு எள்ளினால் நீர்த்தார் கடன் செய்தால், நூறு தலைமுறையினர் நரகத்திலிருந்து கரையேறுவார்கள் என்பது ஐதீகம். இவ்வளவு சிறப்பு வாய்ந்த கும்பகோணம் நகரத்தின் சிறப்பு என்னவென்று பார்ப்போமா?

அஸ்திர தேவர் பாலாபிஷேகம்

ஒரு பிரளய காலத்தில் சிவபெருமான் அனைத்து ஜீவராசிகளின் வித்துகளையும் ஒரு அமுத குடத்திலிட்டு அதை பிரளய நீரில் மிதக்க விட்டார். அந்த குடம் பிரளய வெள்ள நீரில் மிதந்து தற்போது கும்பகோணம் உள்ள இடத்தில் வந்து தங்கியது. மீண்டும் சிருஷ்டியை ஆரம்பிக்க சிவபெருமானே வேடுவ (கிராதக) வேடத்தில் வந்து பாணம் எய்தி குடத்தை உடைத்தார், குடத்திலிருந்த அமுதம், கும்பகோணத்தைச் சுற்றியுள்ள திருவிடைமருதூர், திருநாகேஸ்வரம், தாராசுரம், சுவாமிமலை, திருப்பாடலிவனம் ஆகிய ஐந்து தலங்களிலும் பாய்ந்து அப்பகுதிகளைச் செழுமையாக்கியது. அதன் பிறகு பிரம்மா படைப்புத் தொழிலைத் தொடங்க சிவபெருமானிடம் அனுமதி கேட்டார். சிவன் சம்மதிக்க, பிரம்மன் மனம் மகிழ்ந்து பூர்வ பட்சத்தில் வரும் அசுவதி நட்சத்திர நாளில் கொடி யேற்றம் செய்து, பெருமானையும் தேவியையும் எட்டு நாட்கள் வெவ்வேறு வாகனங்களில் எழுந்தருளச் செய்தார். ஒன்பதாவது நாள் மேரு மலையைப்போல் உயர்ந்த தேர் செய்து, அதில் பஞ்ச மூர்த்திகளை எழுந்தருளச் செய்தார். பத்தாவது நாளான மக நாளில் பஞ்சமூர்த்திகளை வீதி உலா வரச் செய்து, மகாமகத் தீர்த்தத்தில் தீர்த்தம் கொடுக்கும் மாசி மக விழாவை ஆரம்பித்து வைத்தார். அந்த அடிப்படையில்தான் மாசி மக விழா ஒவ்வொரு ஆண்டும் கும்பகோணத்தில் சிறப்பாகக் கொண்டாடப்படுகின்றது. கும்பகோணத்தில் உள்ள பன்னிரண்டு சிவாலயங்களின் மூர்த்திகளும் மஹாமக குளத்தில் தீர்த்தம் கொடுக்கின்றனர். அதே சமயம் வைணவப் பெருமாள்கள் காவிரிக் கரையில் எழுந்தருளி தீர்த்தம் கொடுக்கின்றனர்.

சென்னை சைதை செங்குந்த கோட்டம்

மாசி மக நடராஜர் உற்சவம்

மகாமகத்திலிருந்து மகாமகம் வரைக்கும் உள்ள பன்னிரண்டு ஆண்டு காலகட்டத்தை அவர்கள் "மாமாங்கம்" என்று குறிப்பிட்டார்கள். அது அவர்களுக்கு நீளமான காலமாகத் தெரிந்திருக்கிறது. "மாமாங்கத்துக்கு மாமாங்கம்" என்ற சொல்லடைவும் அதனால் ஏற்பட்டதுதான். மகாமகம் என்பதுதான் மாமாங்கம் என்று ஆகிவிட்டது. ஐந்து மாமாங்கம் கொண்டது ஒரு "ஷஷ்டியப்தம்" என்னும் அறுபதாண்டு.

அங்காளபரமேஸ்வரி அம்மன்

மகாமகத்தன்று சூரியோதய காலத்தில் இக்குளத்தில் நீராட பிரம்மஹத்தி மற்றும் அது போன்ற கொடிய பாவங்களையும் நீர் தேவதை நீக்கி அருள் புரிகின்றார். பொதுவாகவே மாசி ஐப்பசி, கார்த்திகை, வைகாசி மாதங்களில் புண்ணிய தீர்த்தங்களில் நீராடுவது பாவங்களைப் போக்கும் என்கின்றன புராணங்கள்.

திருமயிலை காரணீஸ்வரர் தீர்த்தவாரி

மாசி மகத்தன்று மகா மகக் குளத்திலோ வேறு புண்ணிய தீர்த்தத்திலோ குளித்தால் பிதுர் தோஷம் நீங்கும். சுபிட்சம் கிட்டும். மாசி நீராடல் செய்ய இயலாதவர்கள் வீட்டிலேயே குளித்து விட்டு மாக புராணம் படிக்கலாம். அல்லது பிறர் படிப்பதை கேட்கலாம்.

திருமயிலை ஏகாம்பரேஸ்வரர்
சூரிய பிரப வாகனத்தில்

சாபத்தால் கழுதையான இந்திரன் மாசி மகத்தன்று துங்கபத்திரையில் நீராடி சாபம் நீங்கப் பெற்றான் என்று ஸ்கந்த புராணம் கூறுகிறது. அன்று நெல்லி மரத்தடியில், துளசிச் செடியின் கீழ் உள்ள மண்ணை உடலில் பூசிக் கொண்டு திருமாலை நினைத்தபடி நீராடினால் சகல பாவங்களும் விலகி விடும்.

திருமயிலை திருவட்டீஸ்வரர்
ரிஷப வாகனத்தில்

மாசி மக நட்சத்திரத்தன்று கோள்களின் அமைப்பின் காரணமாக ஈர்ப்புத் தன்மை காரணமாக பூமியில் காந்த சக்தி அதிகமாகி நீர் நிலைகளில் புதிய ஊற்று தோன்றி காந்த சக்தி கலக்கிறது. அதனால் அப்போது நதியில் நீராடுவதால் உடலிலும், மனதிலும் ஆரோக்கியம் அதிகரிக்கும் என்று விஞ்ஞானம் கூறுகிறது.

திருமயிலை எல்லம்மன்

இம் மாதத்தில் எல்லா நாட்களிலும் புனித நீராடுவது பிரயாகை, கங்கை, நர்மதா, காவேரி, கோதாவரி, துங்கபத்திரா, தாமிரபரணி உள்பட 24 கோடி தீர்த்தங்களில் தொடர்ந்து 10 ஆண்டுகள் நீராடிய பலன் ஒரே நாள் நீராடுவதால் கிட்டும். முனி பத்தினியர்கள் சரஸ்வதி நதி தீரத்தில் மண்ணால் அம்பிகை விக்ரகம் அமைத்து மாசி மாதம் 30 நாட்களும் வழிபட்டு சுமங்கலி பேறு பெற்றனர். மாசியின் தேவதை மகா விஷ்ணு. இம்மாதம் முழுவதும் திருமாலை நினைத்து துளசியால் அர்ச்சனை செய்து வழிபட மிகவும் நல்ல பலன் கிட்டும்.

இராயப்பேட்டை ஸ்ரீநிவாசர் கருட சேவை

இது முருகனுக்கும் உகந்த நாள். அன்று முழுவதும் விரதம் இருந்தால் மறுபிறவி இல்லை. அன்று ஏழைக்கு அன்னதானம் செய்யும் பெண்ணுக்கு ஆண்குழந்தை பிறக்கும். மக நட்சத்திரக் கடவுள் குரு பகவான். இருவருக்கு மஞ்சள் உடை அணிவித்து மஞ்சள் மலரால் அர்ச்சித்து வழிபட்டால் எண்ணியது நடக்கும். அன்று தான் முருகன் சிவனுக்கு சுவாமி மலையில் உபதேசம் செய்தார். இரண்யாட்சகனை சம்ஹரித்து பாதாளத்தில் இருந்த பூமியை மகா விஷ்ணு வராக அவதாரம் எடுத்து வெளியில் கொண்டு வந்த நாள் மாசிமகம்.

செங்குந்த கோட்டம் சண்முகர்

மகாமகம் சிறப்பு கும்பகோணத்திற்கு ஏற்படுவதற்கு முன்னமேயே "மாசி மக தீர்த்தவாரி' நடைபெற்ற சிறப்புடையது இந்த "திருநல்லூர்' தலமாகும். "மகம் பிறந்தது நல்லூரில்' என்ற பழமொழியே வழக்கத்தில் சொல்லப்படுவது உண்டு. இத்திருத்தலம் தஞ்சை-கும்பகோணம் நெடுஞ்சாலையில் பாபநாசத்தை அடுத்து உள்ளது. கர்ணணைப் பெட்டியில் வைத்து ஆற்றில் விட்ட குந்திதேவி அந்த பாவம் நீங்க உரோமேச முனிவரிடம் ஆலோசனை கேட்டாள். முனிவர் மாசி மக நாளில் ஏழு கடலில் நீராடினால் இந்தப் பாவம் விலகும் என்று கூறினார். ஒரே நாளில் எப்படி ஏழு கடல் நீராடல் என நினைத்தபோது ஒரு அசரீரி “திருநல்லூர் கோயில் பின்புறம் உள்ள தீர்த்தத்தில் ஏழு கடலை நினைத்து கொண்டு மாசி மகத்தில் நீராடினால் உனக்கு பாப விமோசனம் கிட்டும்” என்று கூறியது. எனவே பஞ்ச பாண்டவர்களின் தாயான குந்தி தேவியின் பிரார்த்தனைக்கிணங்கி திருக்கோயிலின் முன்பு உள்ள "பிரம தீர்த்தம்' என்று வழங்கப் பெற்று வந்த திருக்குளத்தில் மாசி மாதம் பெüர்ணமியன்று உப்பு, கரும்பு, தேன், நெய், தயிர், பால், சுத்த நீரின் சுவைகளை உடைய ஏழு கடல்களையும் வருமாறு திருவருள் புரிந்தார் சிவபெருமான். குந்திதேவியும் அப்படியே செய்து பாப விமோசனம் பெற்றாள். அந்தத் தீர்த்தத்தின் பெயர் ‘சப்த சாகரத் தீர்த்தம்’ என்பதாகும். நாமும் அதில் மாசி மக நாளில் நீராடினால் தெரிந்தோ தெரியாமலோ செய்த பாவம் விலகும்.

திருவண்ணாமலை ஆலய கோபுரம் கட்டிய மன்னன் வல்லாள மகாராஜா. இம் மன்னனுக்கு பிள்ளை இல்லை. எனவே ஆண்டுதோறும் மகாமகத்தன்று அண்ணாமலையாரே பிள்ளையாக எழுந்தருளி ஆண்டுதோறும் பள்ளி கொண்டாபட்டுக்குச் சென்று தீர்த்தவாரி கொடுத்து நீர்த்தார் கடன் செய்தார். தற்போதும் இது திருவண்ணாமலையில் நடைபெறுகிறது.

பார்த்தசாரதிப் பெருமாள்

மாசி வளர்பிறை துவாதசியில் திருவெண்காடு அகோர மூர்த்தி ஆலயத்திற்கு இந்திரனே நேரில் வந்து இந்திர விழா நடத்துகிறார். இதற்கு இந்திர மகோற்சவம் என்று பெயர். இவ்வாலயத்தில் அகோர சிவன் காட்சி தருகிறார். இது போல் வேறு எந்த ஆலயத்திலும் இல்லை. கொங்கு நாட்டில் வெஞ்சமாக் கடலில் மாசி மகத் தேர்த் திருவிழா நடக்கும். மதுரை மீனாட்சி ஆலயத்தில் மாசி மக விழா 16 மண்டலம் நடக்கும்.

திருவல்லிக்கேணி பார்த்தசாரதிப் பெருமாள்
கருடவாகன சேவை

ஆனந்த கூத்தர், சிற்றம்பல வாணர், சிவகாமி நேசர், நமையீன்ற நடராசரின் ஆறு திருமுழுக்குகளில் ஒன்று மாசி மாத சதுர்த்தசி நாளில் நடைபெறுகின்றது. இது தேவர்கள் செய்யும் முதற்கால பூஜை என்று ஐதீகம்.

சென்னையில் கடற்கரையெங்கும் பல இடங்களில் அனைத்துக் கோவில் திருமூர்த்தங்களும் எழுந்தருளி தீர்த்தக் கொடுக்கின்றனர். கலங்கரை விளக்கத்திற்கருகில் மயிலை கபாலீஸ்வரர் முதலிய சைவ திருக்கோவில் தெய்வங்கள் கடலுக்குச் சென்று தீர்த்த வாரி வழங்குகின்றனர், கடலாட்டு விழாவிற்கு சோமாஸ்கந்தர் வருவதில்லை, சந்திரசேகரர்தான் வருகின்றார் வெயில் காலம் என்பதால் பல்லக்கில் எழுந்தருளுகிறார். சுவாமி , உடன் அஸ்திர தேவரும் வருகின்றார். சந்திர சேகரர் கடலுக்குள் பல்லக்குடன் சென்று விட்டு கரைக்கு திரும்பி வந்தவுடன் முதலில் அஸ்திர தேவர் கடலில் வந்து நீராடும் போது அவருடன் பக்தர்களும் அவருடன் கடலில் நீராடி தங்கள் பாபங்களை போக்கிக்கொள்கின்றனர். பின்னர் கடற்கரையில் அஸ்திர தேவருக்கு, மஞ்சள் , திருமஞ்சனப்பொடி, சந்தனம், பால், தயிர், தேன், பன்னீர் அபிஷேகங்கள் நடைபெறுகின்றன பின்னர் அஸ்திர தேவருக்கும் சிவபெருமானுக்கும் தீபாரதனர் நடைபெறுகின்றது. இன்றைய தினம் சிறப்பு நைவேத்யம் வெள்ளரிக்காய், கோடைக் காலம் தொடங்கி விட்டதாலோ?

காலை தொடங்கி சுமார் பன்னிரண்டு மணிக்கு கபாலீஸ்வரர் கடலாடும் வரை அனைது தெய்வ மூர்த்தங்களுடனும் நீராடும் பக்தர்களின் பக்தியை என்ன வென்று சொல்ல.

திருமயிலை காரணீஸ்வரர்

சீரணி அரங்கத்திற்க்கருகில் வைணவ தெய்வங்களின் தீர்த்தவாரி நடைபெறுகின்றது. அதிகாலையில் பார்த்தசாரதிப்பெருமாள் கருட வாகனத்தில் எழுந்தருளி தீர்த்தம் கொடுக்கின்றார். மற்ற பெருமாள்கள் பின் தொடர்கின்றனர். இங்கு சுதர்சனப் பெருமாள் கடலாடுகின்றார். இப்பதிவில் தாங்கள் காணும் படங்கள் எல்லாம் சென்னை திருக்கோவிலில் எடுத்த மாசி மகப் படங்கள்.

தென்காசி விசுவநாதர் ஆலயத் தேர்த் திருவிழா மாசி மக பிரம்மோற்சவத்தில் நடக்கின்றது, தேர் விழா முதல் நாள் தடம் பார்த்தல் நிகழ்ச்சி இன்றும் நடக்கிறது. பூண்டி முருகர் ஆலயத்தில் மாசி மக தேர்த்திருவிழா கோலாகலமாக நடக்கிறது.
திருநெல்வேலியில் அன்று நடக்கும் தெப்ப விழாவிற்கு அப்பர் தெப்பம் என்று பெயர்.

அது போல் திருக்கோஷ்டியூர் வைணவத் தலத்தில் தெப்ப உற்சவம் சிறப்பாக நடைபெறும். இதற்கு ‘ஜோசியர்வாள் தெப்பம்’ என்று பெயர். அன்று தெப்பக் குளக் கரைகளில் ஆயிரக்கணக்கான அகல் தீபங்கள் ஏற்றப்பட்டு இருக்கும். இந்த வேண்டுதல் விளக்கை வீட்டிற்கு எடுத்துச் சென்று நெற்பானையில் வைத்து அடுத்த ஆண்டு தெப்பத்திற்கு குளக்கரையில் ஏற்றுவார்கள்.

கபாலீஸ்வரர்

திருச்செந்தூர், திருத்தணி ஆகிய சுப்பிரமணியத்தலங்களில் மாசி மகம் பத்து நாள் சிறப்பு விழாவாகக் கொண்டாடப்படுகின்றது. திருவொற்றியூரில் சுந்தரர் திருக்கல்யாணம் நடைபெறுகின்றது. தியாகராஜசுவாமி, சுந்தரருக்கும் சங்கிலி நாச்சியாருக்கும், அறுபத்து மூன்று நாயன்மார்களுக்கும் மகிழ மரத்தடி சேவை தந்து அருளுகின்றார்.

திருக்கண்ணபுரம் பெருமாள், திருமருகல் பெருமாளுடன் சுமார் 70 கி. மீ பயணம் செய்து பாண்டிச்சேரி திருமலைராயன் பட்டிணத்தில் மீனவர் குல மருமகனாய். மாப்பிள்ளை சாமியாக தங்க கருட வாகனத்தில் சேவை சாதித்து கடலில் தீர்த்தம் தந்தருளுகின்றார். அன்றைய தினம் காரைக்கால் பகுதியை சார்ந்த ஏழு பெருமாள்களும் உடன் எழுந்தருளி அருள் பாலிக்கின்றனர்.

அஸ்திர தேவருக்கு புண்ணிய நீர் அபிஷேகம்

கடலூர் தேவனாம் பட்டினத்தில் திருக்கோவிலூர் உலகளந்த பெருமாள், திருப்பாதிரிப் புலியூர் பாடலீஸ்வரர், என்று பெருமாளும் ஈசனும் ஒன்று கூடி எழுந்தருளும் வழக்கம் உண்டு மற்றும் அப்பகுதியின் சுமார் 100 மூர்த்திகள் எழுந்தருளி தீர்த்தம் கொடுத்தருளுகின்றனர். ஸ்ரீமுஷ்ணம் பூவராகப் பெருமாள் கிள்ளைக் கடற்கரைக்கு வரும் போது, முஸ்லீம் பெருமக்கள் அவருக்குப் பட்டு சார்த்தி வழிபடும் வழக்கம் இன்றும் உள்ளது.

சண்முகர் பின்னழகு

பாண்டிச்சேரியில் வைத்திக்குப்பத்தில் மாசி மக கடலாட்டு மிகவும் சிறப்பாக நடைபெறும். நூற்றுக்கு மேற்பட்ட சுவாமிகள் எழுந்தருளி தீர்த்தம் கொடுத்தருளுகின்றனர். காஞ்சிபுரத்தில் காமாக்ஷியம்மனின் பிரம்மோற்சவம் மாசி மகநாளை தீர்த்த நாளாகக்கொண்டு நடைபெறுகின்றது. திருகடல்மலையில் அமைந்துள்ள அருள்மிகு ஸ்தலசயனப் பெருமாள் திருக்கோயில் காசி, ராமேசுவரத்துக்கு இணையான அர்த்த சேது என்ற பெருமைக்கு உரிய தலமாகும் .இங்கு மாசி மகத்திற்கு முதல் நாள் தெப்போற்சவமும், அதைத் தொடர்ந்து மறுநாள் மாசி மகம் தீர்த்தவாரியும் நடைபெறுகின்றது.

வட நாட்டிலும் கும்பமேளாக் கொண்டாடபப்படுவதும் மாசி மகத்தை ஒட்டியே. இந்த வருடம் ஹரித்துவாரத்தில் கும்பமேளா நடைபெறுகின்றது, மஹாமகத்தின் போது திரிவேணி சங்கமமான அலகாபாத்தில் கும்பமேளா நடைபெறுகின்றது.

நாமும் மகத்தன்று அருகில் நடைபெறும் தீர்த்தவாரியில் கலந்து கொண்டு புனித நீராடி சுவாமி தரிசனம் செய்து பாவம் போக்கி அருள் பெறுவோமாக.